O Concello de Foz (Lugo) espera comunicación oficial que clarifique se se repatriará o cadáver ou se enterrará no municipio o corpo de Miniaene Franco, a muller falecida supostamente a mans do seu fillo de 17 anos, de orixe brasileira e nacionalidade española, co que residía no municipio.
O pleno do Concello de Foz acordou este martes decretar tres días de loito polo asasinato desta veciña de 36 anos, cuxo corpo foi localizado na mañá do pasado luns no seu domicilio con feridas de arma branca.
O loito comezou ás doce da madrugada deste mércores día 6 e terminará o venres a media noite. Previamente á celebración da sesión plenaria, tivo lugar unha concorrida concentración en homenaxe á muller asasinada e en contra de calquera tipo de violencia convocada polo propio goberno municipal.
Mentres, na mañá do martes levou a cabo outro acto no instituto de Foz onde a muller estudaba un curso superior de hostalería, onde os compañeiros e equipo directivo gardaron un minuto de silencio para renderlle homenaxe.
O Concello acordou tamén unha declaración institucional na que, segundo manifestou o alcalde da localidade, Francisco Cajoto, "o conxunto da corporación lamenta o triste suceso e presunto crime de violencia doméstica, rexeitando calquera tipo de violencia e ao mesmo tempo transmite a súa pésame á familia, coñecidos e amizades da vítima".
A poboación vai recobrando a normalidade tras o sucedido, segundo apuntou o alcalde, quen unha vez máis lamentou os feitos e resaltou que todo este capítulo produciu unha gran conmoción.
ENTERRO. Tras o ingreso do presunto autor do crime nun centro de menores, decretado este martes polo Xulgado de Menores de Lugo, a localidade de Foz centra a súa atención no que pasará co corpo da vítima, que non ten familiares na zona.
De momento, segundo sinalou o rexedor municipal, o Concello mantense á espera do que comunique o xulgado pertinente e a Fiscalía para saber que facer respecto diso.
"Estamos pendentes das noticias por parte do xulgado e resto de organismos competentes para saber se procede a repatriación ou que é o que vai pasar", declarou o alcalde focense.
Así mesmo, o rexedor apuntou que o Concello está en contacto con varios amigos da vítima que están en comunicación coa familia da falecida. Ademais, comentou que o Concello e a parroquia colaboran e realizan xestións por se fixese falta facilitar unha sepultura.
