A mobilización da Mariña para reclamar unha solución que dea continuidade á planta de aluminio de San Cibrao continúa e medra, cunha nova convocatoria de concentración. Tras as multitudinarias manifestacións dos dous últimos fins de semana en Ribadeo e Viveiro e a marcha en Xove, a próxima data sinalada no calendario é a deste domingo, para cando se organizou unha concentración en Foz.
A convocatoria, da que se fixeron eco varios membros do grupo público de Facebook A Mariña Sálvase Loitando —con máis de 12.000 membros—, chama a participar na mobilización na praia da Rapadoira ás 11.00 horas. O lema é o mesmo que dá nome ao grupo, convertido xa en berro de unión.
O acto dá continuidade ás protestas organizadas unha vez que Alcoa comunicou hai dúas semanas o inicio dun período informal de consultas para empezar un proceso de despedimento colectivo que afectaría a un máximo de 534 traballadores da planta de Aluminio.
O comité de empresa convocou os traballadores a asembleas informativas que se celebrarán este venres para informar dos últimos acontecementos, así como das mobilizacións que poderían desenvolverse nos próximos días. Ademais das manifestacións en Ribadeo, Viveiro e Xove, nos últimos días houbo cortes nos accesos á factoría.
