O Ministerio de Fomento cedeu ao Concello de Mondoñedo a titularidade de dous tramos da antiga estrada N-634 cunha lonxitude de 1.547 metros, que ata agora tiña a consideración de viario anexo á Rede de Estradas do Estado.
Segundo explicou Fomento nun comunicado, o Concello de Mondoñedo solicitou ao Ministerio a transferencia da titularidade do tramo de San Vicente, cunha lonxitude real de 367 metros da N-634, e unha superficie estimada de 6.712 metros cadrados.
Ademais, pediu a cesión do tramo de Sasdónigas, desde o quilómetro 598,4 da N-634, ata o 599,588, cunha lonxitude real de 1.180 metros da N-634 e unha superficie estimada de 16.282 metros cadrados. "Unha vez acreditado o cumprimento dos requisitos legalmente establecidos, ao amparo das condicións establecidas no artigo 5 da Lei 37/2015 de Estradas, o Ministerio de Fomento considerou procedente acceder ao solicitado", subliñou Fomento.
Estes feitos prodúcense menos dunha semana despois de que que a alcaldesa de Mondoñedo, Elena Candia, solicitase unha reunión coa subdelegada do goberno en Lugo para falar sobre o arranxo da estrada e promover "unha actuación que mellore o seu mal estado de conservación".
