O Ministerio de Fomento adxudicará o próximo mes de setembro obras de rehabilitación integral en 20 quilómetros da N-642 cun investimento de 2,9 millóns de euros. Os traballos levaranse a cabo nos tramos comprendidos entre o punto quilométrico 26,950 e 28,800, entre a conexión da N-642 coa N-634 e o núcleo focense de Mañente e desde o 36,500 e o 55, entre Fazouro, en Foz, e San Cibrao, que eran os tramos cuxa licitación xa se anunciou o pasado mes de xaneiro.
Ademais, o ministerio está a redactar o proxecto de rehabilitación integral dos outros trinta quilómetros que ten esta estrada, co fin de acabar o acondicionamento completo dunha nacional que presenta un estado moi deteriorado en moitos dos seus tramos.
Paralelamente, séguense levando a cabo os traballos de urxencia que deixou proxectados o Goberno anterior en distintos puntos. De todos os xeitos, desde Fomento subliñan que o proxecto de rehabilitación integral que se está redactando nestes momentos inclúe os tramos sobre os que xa se está actuando para mellorar toda a infraestrutura.
REUNIÓN. O anuncio chega días despois de que o secretario provincial do PSOE, Álvaro Santos, mantivese un encontro con responsables do ministerio no que lle confirmaron que o anterior Executivo tiña bloqueados os asuntos de Fomento na provincia de Lugo. Segundo indicaron, agora o que están a intentar é desatascalos e axilizalos dentro da marxe orzamentaria co que contan.
Precisamente os socialistas lucenses elaboraran unha radiografía detallada sobre o estado do conxunto das vías estatais na provincia o pasado mes de febreiro. De feito o entón portavoz socialista de Fomento, César Ramos Esteban, estivera en Foz acompañado de alcaldes, concelleiros e representantes do PSOE na comarca para facer público este informe e denunciar o abandono das infraestruturas necesarias para vertebrar as comunicacións.
Executáronse melloras en Foz e en Ribadeo
Nestes dous tramos arranxados estiveron a executarse os traballos de sinalización horizontal en días pasados.
