A Coordinadora para o Estudo dos Mamíferos Mariños (Cemma) indica que outras dúas focas merodean fronte a Burela. Ambas foron avistadas por particulares nas inmediacións da praia da Marosa e desde a organización xa as bautizaron como Marosa 1 e Marosa 2.
A primeira deixouse ver na mañá deste martes tras recalar no areal para descansar. Inicialmente pensouse que sería a mesma que despois recolleu exhausta persoal municipal na praia do Perdouro, pero polas fotos que fixeron os veciños a Cemma cre que se trata de dous animais distintos. A ambos sumouse este mércores un novo exemplar, que se deixou caer pola Marosa tamén cara ás dez da mañá, pero cando Protección Civil chegou ao lugar xa non logrou localizala.
A recollida no Perdouro é un macho que agora está ingresado na unidade de coidados que ten a Cemma en Nigrán. O mamífero mariño, que saíu a descansar cerca do porto burelense, é un xuvenil, duns seis meses de idade, que pesa 27 quilos. O macho do Perdouro, que chegou con síntomas de esgotamento e pequenas feridas de abrasión sen maior importancia, continuaba este mércores en observación á espera da súa evolución.
Este lobo mariño cincento atópase en bo estado, segundo confirman desde a Consellería de Medio Ambiente, organismo que ten baixo a súa responsabilidade a rede de varamentos de Galicia a través do convenio subscrito coa Cemma para a asistencia e recuperación da fauna mariña.
