Unha muller enfróntase a catro anos de prisión e os seus pais, a tres anos e medio, por delitos de lesións cometidos presuntamente contra a actual parella do seu ex e contra este en O Valadouro, nun xuízo que se celebrará o xoves no Penal 2 de Lugo. O fiscal tamén propón que sexan indemnizados en 15.000 euros a muller e en 9.000 euros o home, que doutra banda se enfronta a nove meses de prisión por un delito de malos tratos non habituais a súa ex e indemnización de 500 euros polas lesións que tamén lle causou na pelexa.
Segundo o escrito os feitos sucederon o 22 de outubro de 2014 na vía pública nunha parroquia do Valadouro cando o home e a súa actual parella dispúñanse a entregar á ex a filla común de ambos e iniciouse unha discusión que acabou con agresións "a golpes e patadas". A acusada e os seus pais "golpearon reiteradamente e sacaron do coche tirándolle dos pelos" á actual parella, momento en que o home "ao ir axudala golpeou" a súa ex e despois foi "agredido con patadas, puñadas e golpes" polos outros tres.
A actual parella estivo hospitalizada dous días e as lesións tardaron 180 en curar, quedándolle como secuela un trastorno de tensión postraumática, mentres que o home tamén sufriu lesións en distintas partes, entre elas a perda dun dente e o desprazamento doutros tres. A súa ex tivo así mesmo policontusións que tardaron 15 días en curar. No altercado o home perdeu unha cruz de ouro e resultaron danados o seu coche e a súa camisa, polo que tamén reclama.
O fiscal expón ordes de afastamento de 200 metros mutuas para o home e a súa ex, de ano e medio para el e de catro anos para ela, ademais de que esta e os seus pais indemnicen ao Sergas en 442,29 euros pola atención prestada á actual parella.
