O delegado do Goberno en Galicia, José Miñones, deu este martes por finalizadas as probas con prototipos promovidas polo Ministerio de Transportes no Alto do Fiouco, para buscar unha solución innovadora que permita liquidar os problemas de visibilidade que provocan os densos bancos de néboa nese tramo da Autovía do Cantábrico (A-8), entre Abadín e Mondoñedo.
Miñones asegurou que os resultados nesta fase experimental son "prometedores", pero agora será o ministerio o que decidirá "cal ou cales" deses sistemas serán definitivamente instalados nesa vía, dado que nalgúns casos as solucións expostas implican grandes investimentos, ao tratarse de estruturas complexas.
En todo caso, o delegado insistiu "na aposta do Goberno de España por facer da Autovía do Cantábrico unha vía segura e aberta totalmente ao tráfico coa implementación das solucións experimentais de apoio á condución e de miniminación das néboas no Alto do Fiouco". A fase de probas dos catro prototipos instalados realizouse nun tramo anexo ao da vía na parte máis elevada entre Mondoñedo e A Xesta (Abadín).
O delegado explicou que, unha vez finalizada esta fase, o Ministerio de Transportes realizará unha avaliación dos resultados, que, "segundo o que puidemos ver hoxe, son moi prometedores" e analizará a súa idoneidade para resolver a problemática no Fiouco para, finalmente, decidir sobre a súa contratación e instalación final.
Tráfico está a finalizar a instalación de 372 novas balizas tipo led no tramo
Na súa intervención, José Miñones puxo en valor a colaboración entre o ministerio e o sector privado para atopar solucións a un problema, o da néboa, que non se dá en ningunha outra parte da rede de estradas e en pouquísimos lugares do mundo". Por iso, destacou que é a sociedade a gañadora desta "carreira de solucións na que fomos man a man cos equipos de I+D das empresas de sector, unindo forzas e vontade".
O Ministerio de Transportes, Mobilidade e Axenda Urbana (Mitma) comezou este proxecto a finais de 2019 a través do sistema de compra "pública precomercial (CPP) para o deseño, implementación e experimentación con prototipos de tecnoloxía innovadora". O importe do contrato ascendeu a 5,64 millóns de euros, cofinanciado nun 80% a través do Programa Innocompra do Ministerio de Ciencia e Innovación, mediante o Fondo Europeo de Desenvolvemento Rexional (Feder) 2014-2020.
A contratación dividiuse en dous lotes: o primeiro para o desenvolvemento de solucións innovadoras baseadas en sistemas de axuda á condución en situacións de néboa e o segundo para o desenvolvemento de solucións innovadoras baseadas en sistemas que actúan sobre a néboa mediante o seu illamento, eliminación ou desprazamento.
A fase dúas do proceso de selección para elixir as propostas máis eficaces acaba de finalizar, coa experimentación en campo a escala real dos catro prototipos seleccionados na primeira parte do mesmo.
No que vai de ano o tramo pechouse ao tráfico 69 veces
As propostas correspondentes ao lote 1, que son de axuda á condución, consisten nun sistema de balizamento lateral con luz láser e nun sistema de sinalización horizontal intelixente con tecnoloxía led, proxectada sobre a calzada.
No caso destas solucións, Miñones espera "algunha información" ao longo do mes de novembro, aínda que a tramitación dos proxectos correspondentes ao lote 2 prolongarase algo máis no tempo, dado que son estruturas máis complexas: un sistema de difusión automático por aspersores de materiais higroscópicos e un sistema que combina barreiras estáticas e barreiras dinámicas que empregan dispositivos fluído-mecánicos.
"Nos próximos meses asistiremos a un salto cualitativo neste tramo, coa combinación dun ou varios dos dous sistemas técnicos que coñecemos hoxe coas melloras da seguridade viaria que xa estamos a executar", asegura Miñones.
Tráfico está a finalizar neste momento a instalación de 372 novas balizas tipo led no tramo, que permitirán que o limiar mínimo de visibilidade, por baixo do cal se pecha o tramo á circulación, baixe dos 40 metros actuais aos 30 metros.
O delegado recordou que, agora, cando se alcanzan os 40 metros de limiar mínimo de visibilidade o Centro de Xestión de Tráfico desvía automaticamente a circulación cara á N-634 desde a saída da Xesta ata Mondoñedo. "Coas balizas novas operativas, Tráfico calcula que os peches reduciranse nun 78%, é dicir, a só unha de cada catro veces das que agora permanece pechada", precisou. No que vai de ano o tramo estivo pechado ao tráfico en 69 ocasións.
