A sétima edición do Festival Bal e Gai (a primeira que inclúe obras sinfónicas na súa oferta) estenderase por sete concellos de A Mariña Lucense, con actividades e concertos en Foz, Mondoñedo, Ribadeo, Vilanova de Loruenzá, Barreiros e Trabada nun encontro que se abrirá coa Real Filharmonía de Galicia e que contará con artistas de proxección nacional e internacional entre os que figuran o Cuarteto Quiroga, o Quinteto Invento ou o pianista Juan Pérez Floristán entre outros.
Coa intervención da Real Filharmonía baixo a dirección de Maximino Zumalave cun concerto o 12 de agosto na Catedral de Mondoñedo con obras de Mozart (Adagio e Fuga en do menor), Bal e Gai (Concerto Grosso) e Mendelssohn (Sinfonía nº 4) ábrese un festival no que se ofrecerán un total de sete concertos, a proxección do documental Dancing Beethoven (16 de agosto no Auditorio de Mondoñedo e na Casa da Cultura de Foz), a conferencia Como se transforman sociedades a través da música, a cargo de Nathaly Ossa (21 de agosto na Casa da Cultura de Foz) e cinco concertos familiares.
Tras a actuación da Real Filharmonía o Bal e Gai trasládase o día 14 á Igrexa Parroquial de Foz, onde a soprano Ana Vieira e basse de violón Fernando Santiago ofrecerán un programa dedicado á música barroca francesa con obras de Brossard, Hotteterre, Visée e Clérambault.
Pola súa banda, os días 15 e 16 de agosto terán lugar os Concertos Familiares a cargo do Quinteto Invento e Arcos Iris. O día 15 o Quinteto Invento ofrecerá o espectáculo Pedro e o lobo en Mondoñedo, Barreiros e Trabada mentres que o día 16 Arcos Iris ofrecerá as súas Músicas do mundo en Viveiro e Vilanova de Lourenzá.
Tras os dous programas didácticos que se ofrecen en cinco concellos da Mariña, o Festival continuará o día 18 co Cuarteto Cosmos e o clarinetista Luís Cámara, que actuarán na Igrexa Santa María del Campo de Viveiro para ofrecer un programa co Cuarteto op. 74 de Haydn e o Quinteto de clarinete op. 115 de Brahms.
O Pazo de Fontao será o escenario, o día 19, dun recital do pianista Juan Pérez Floristán con obras de Beethoven e Ginastera mentres que a Basílica de San Martiño de Foz acollerá o día 20 un concerto do Cuarteto Quiroga, dedicado integramente á obra de Ludwig van Beethoven no 250 aniversario do seu nacemento e no que se escoitarán os cuartetos op. 132 e op. 135.
O Festival ábrese tamén ao jazz, cun concerto de Hot Chocolates o día 22 en Porto Mozo, en Foz, que ofrecerá un espectáculo festivo entre a alegría do jazz tradicional e a diversión do swing dos primeiros anos do Cotton Club de Nova York e as actuacións de Duke Ellington e Fletcher Henderson entre outros.
A música de Beethoven, coa súa Sinfonía nº 3 e a abertura Egmont, protagonizará tamén o peche desta sétima edición do Festival co concerto que o día 24 de agosto ofrecerá o Ensemble Bal e Gai no Auditorio de Ribadeo.
