A colisión frontal entre un coche e un camión na estrada de Bispo Santo a San Martiño, en Foz, saldouse co condutor ferido, un mozo focense de 23 anos, quen tivo que ser excarcerado do vehículo polos bombeiros de Barreiros e trasladado ao Hospital da Mariña, en Burela, debido a que o automóbil quedou incrustado debaixo do camión.
O accidente, que se produciu no quilómetro 0,500 da vía mencionada, puido deberse a que o lesionado padece narcolepsia, doenza que causa adormecemento.
O 112 mobilizou a dúas ambulancias, unha medicalizada e outra asistencial do servizo de Urxencias Médicas 061, encargadas de prestar asistencia ao ferido. Tamén interviñeron a Policía Local e Protección Civil de Foz, o GES de Cervo e a Garda Civil de Tráfico.