Un menor resultou atropelado por un autobús na mañá deste mércores cando se dirixía en bicicleta ao colexio de Nois, no concello de Foz. Os servizos sanitarios de Urxencias Médicas do 061 atenderon ao neno no lugar do accidente e en principio as súas feridas non parecían graves.
A familia rexeitou o traslado do menor en ambulancia e ocupouse persoalmente de levalo a un centro médico para que lle realizasen un recoñecemento máis exhaustivo e así descartar lesións de maior consideración.
O contratempo, que se produciu cara ás nove e media da mañá no Camiño dous Castros (a vía que vai cara ao colexio), saldouse sen máis feridos, posto que o autobús ía baleiro nese momento.
Desde a central de urxencias do 112 en Galicia comunicaron a incidencia á Garda Civil de Tráfico, a Policía Local focense, os bombeiros de Barreiros e o GES de Cervo.
