Un veciño de San Xusto de Cabarcos en Barreiros, de 41 anos de idade, resultou este venres ferido moi grave ao ser arroiado polo seu tractor coa fresadora en marcha. O accidente produciuse no lugar do Morteiro cando o home baixou do vehículo agrícola para retirar algo que viu diante do mesmo e regresar de inmediato, pero a máquina seguiu o seu camiño e pasoulle por enriba.
O sinistro saldouse con feridas de gran consideración nunha perna, que resultou moi danada pola fresadora, e nunha man. Tal era a súa gravidade que desde o servizo de Urxencias Médicas 061, que desprazou unha ambulancia medicalizada para o traslado, solicitouse a escolta de patrullas da Garda Civil de Tráfico para evacualo ata o Hospital de Lugo (Hula).
Os Bombeiros de Barreiros e Protección Civil tamén colaboraron para desprazar o ferido, que alertou el mesmo ao 112, indicando que se atopaba só e lesionado. Estes efectivos axudaron a inmobilizalo e trasladalo en padiola desde o prado onde se atopaba, afastado da estrada, ata a ambulancia para evacualo canto antes.