Unha tenreira que pastaba nun pasteiro da parroquia valadouresa de Frexulfe resultou ferida nun ataque de depredadores, presumiblemente lobos, ocorrido nas últimas horas. A propietaria do gando, Isabel Prieto, cre que o ataque puido producirse de noite nun cercado da serra.
O animal doméstico puido defenderse aínda que resultou con serias feridas nas patas traseiras que requiriron asistencia veterinaria. O ataque puido sobrevir desde algunha das mandas que se moven polo Xistral e que tamén afectan cada certo tempo ao gando cabalar.
En febreiro do 2017 un gandeiro do Cadramón perdeu unha res ao resultar devorada unha tenreira de sete meses e entre moitos colegas con explotacións no Valadouro e Alfoz principalmente, rende o desánimo, pois estes non son os únicos avisos. Perderon vacas, cabalos ou ovellas.
A miúdo é difícil xustificar as perdas posto que os restos son rapidamente "limpados" por outros carroñeiros. A zona é das máis afectadas da Mariña e a Consellería de Medio Ambiente ofrece compensacións se se comunican nas 24 horas seguintes á súa detección.