O Mercado Renacentista de Viveiro trae este ano varias novidades, entre elas a incorporación de dous concertos hoxe mércores e mañá xoves, a realización de xogos na praia previos ao Desembarco de Carlos V o venres ou a participación do guía Suso Martínez neste acto para dirixir tres visitas teatralizadas de balde polo "Viveiro renacentista", segundo avanzaron onte a concelleira de cultura, Lara Fernández, e a alcaldesa, María Loureiro, na presentación da feira, que seguirá ata o domingo e que como cada ano contará con decenas de postos e actividades de animación.
O programa arrinca a noite deste mércores co concerto 'A vida bona' do coro Tempus Fugit ás nove nos claustros de San Francisco, onde cantarán "partituras do Renacemento" co apoio dos músicos David Belas e Felipe Sánchez e coa colaboración da Xunta de Confrarías, que achega hachones para "crear un ambiente máis espectacular".
Pola súa banda, a formación Lucus Ensemble ofrecerá este xoves ás oito e media no teatro Pastor Díaz un concerto —de balde, coma o anterior— no que os músicos incorporan instrumentos medievais como unha giga, unha viola de perna de tres cordas, un salterio e unha zanfona medieval que forman parte da colección do Centro de Artesanía e Deseño (Centrade) da Deputación. Tamén o xoves, ás seis da tarde, abren os postos do mercado e arrincan as actividades de animación, das que se encarga Legend, e que continuarán ata o domingo pola noite.
O Concello completa a parte lúdica da feira con actividades culturais de face a solicitar que sexa Festa de Interese Turístico
O día máis destacado é o venres, con xogos na praia de seis a oito a cargo de Roq Sport previos ao Desembarco de Carlos V, previsto para as nove, onde Víctor Rolle fará do emperador, Olga Méndez de Juana a Tola e Rosa Lage de Isabel de Portugal. "Este ano participan máis asociacións", comenta a concelleira, que cita as xustas con Legend, os tambores da Piedade, Cabaleiros de Viveiro ou integrantes de Sala 5, Pequenos Pasos e os grupos de teatro Crea e Andanzas, ademais de Bágoas da Terra, que fará un baile xa na Praza Maior.
Como novidade incorpórase o guía Suso Martínez no papel de Juan Ares Viçoso, procurador da vila que recibe ao emperador e guía á comitiva ata o consistorio, onde tamén elixirá á liñaxe que gobernará en Viveiro un ano. Ao terminar este acto, Martínez guiará unha visita teatralizada polo centro histórico, actividade que se repite o sábado e o domingo con saída da mesma Praza Maior ás once da mañá. Con estas visitas e cos concertos o Concello pretende "potenciar a cultura e dar a coñecer o que había na época que evoca o mercado", comenta Lara Fernández, e con iso sumar requisitos para no futuro solicitar que a festa sexa declarada de Interese Turístico Galego.
ALUGUER DE TRAXES. Por outra banda, a Irmandade do Prendimiento continúa co aluguer de traxes de época para o Mercado Renacentista na planta baixa da biblioteca (antigo concello) de sete a nove da tarde. Custa 25 euros o aluguer de traxe de adultos, 18 o de nenos e 50 a venda de traxes de adultos. Asemade, a Irmandade vende a medalla conmemorativa que nesta edición leva o escudo da liñaxe Ribadeneira.
