A Feira de Artesanía de Viveiro botou o peche e conseguiu algo complicado nos últimos anos, como é facer crecer o número de vendas entre os expositores. Isto nótase especialmente nun sector aberto a todo tipo de competencias. Aínda así, os 32 participantes nesta iniciativa da asociación de artesáns Proa mostraron a súa satisfacción polo desenvolvemento dunha cita que se está xestando xa para o ano próximo na cidade do Landro.
Unha das responsables da organización, Paula Díaz, explicou a súa alegría por ver como se foi desenvolvendo esta feira e falaba sobre todo da circunstancia de que "tivemos moita variedade, algo que en ocasións neste sector é moi difícil de conseguir, non porque non haxa, senón porque é complicado que che veña tanta xente de tantos sectores diferentes". Dixo que é algo que non só notaron eles, "senón que vimos que era algo que a xente que acudía á feira comentaba tamén, e iso é importante para nós".
Tamén indicou que desde a organización están satisfeitos "porque constatamos que os propios artesáns márchanse tamén contentos". Paula Díaz explicou que todos os anos reparten entre eles nos últimos días unha enquisa para que fagan as súas propias suxestións ou expoñan as súas queixas "e en xeral hai que dicir que as respostas que nos atopamos son francamente positivas, así que é algo moi importante para nós".
IDEAS. Con respecto á enquisa, apuntou que tamén lles pedimos que acheguen ideas para outros anos, porque se trata de xente que nalgúns casos anda por feiras por toda España e sempre fai achegas positivas, algo que tamén sucedeu nesta edición".
Díaz indicou que no que respecta ao incremento das vendas é incluso unha sorpresa, "porque é certo que nos últimos anos complicouse o de ir crecendo nisto, pero este ano, polo que vimos, os artesáns márchanse máis ou menos contentos e iso está ben porque ao final tamén é unha inxección de moral para o ano que vén".
Na feira concedéronse dous premios aos mellores expositores que finalmente se entregaron o domingo. O gañador foi Taller Lirandy, que levou 200 euros, en tanto que en segundo lugar quedou Las Flores de Greta, que levou un premio de 100.
