O presidente da Xunta, Alberto Núñez Feijóo, dixo este venres que "sería bo que o Goberno central non perda máis o tempo" ao atopar unha solución para Alcoa San Cibrao tras levar "ano e medio mareando" aos traballadores, á industria, á Mariña lucense e ao Goberno galego.
A preguntas dos medios na rolda de prensa tras a reunión semanal do seu Executivo, o mandatario autonómico lamentou que en España "non hai nin unha soa industria" das consideradas electrointensivas "que saiba cal é o horizonte" do prezo da enerxía "para poder traballar durante os próximos anos".
Así, apuntou que o que ocorreu con Alcoa, tras o anuncio do despedimento de máis de 530 traballadores na fábrica de San Cibrao, é que "dixo que con esta falta de planificación do prezo eléctrico non vai volver a producir aluminio primario en España". Ademais da afectación a nivel laboral que isto implica para "700 familias", o titular da Xunta lamentou o "impacto na economía lucense sen precedentes" que isto vai xerar.
Preguntado sobre as críticas recibidas da oposición por non comparecer na Deputación Permanente do Parlamento galego sobre a crise de Alcoa, Feijóo dixo non saber "cal é a dificultade ou o problema", posto que o encargado de acudir "de forma inmediata" á Cámara foi o conselleiro de Economía, Emprego e Industria, Francisco Conde. "Somos, probablemente, o Goberno co Parlamento disolto desde hai meses que máis compareceu nunha Deputación Permanente desde que hai comunidade autónoma", defendeu.
