O presidente da Xunta trasladou esta tarde á ministra para a Transición Ecolóxica a súa "preocupación" polo futuro de Alcoa en San Cibrao. "Cremos que o apagado das cubas é unha decisión de enorme risco industrial para España", afirmou Alberto Núñez Feijóo en rolda de prensa tras a reunión que mantivo en Santiago con Teresa Ribeira, que viaxou a Galicia ante o inicio do dragado da Ría do Burgo.
Entre os asuntos abordados, o mandatario galego aludiu á tensión que os elevados prezos da enerxía supoñen para a industria electrointensiva en Galicia –con representantes como Alcoa, Ferroatlántica ou Megasa–. No caso da planta de Cervo, avisou do risco de que España "quede sen produción de aluminio primario" e de que Galicia perda, de paso, unha das súas industrias máis relevantes. é por iso que incidiu na necesidade de "activar as cubas sen esperar a 2024", en alusión á decisión da multinacional de Pittsburgh de hibernar a produción de aluminio durante os próximos dous anos, co compromiso de retomala en xaneiro de 2024, cando o grupo espera contar con contratos bilaterais (PPA) de subministración eléctrica que viabilicen a actividade.
En rolda de prensa, Feijóo explicou que trasladou a Ribeira que a Xunta está "predisposta" a que Alcoa poida asinar algún PPA "antes desa" data. Para iso, avanzou que modificará a Lei de áreas empresariais de Galicia para dar "prioridade de despacho" aos proxectos eólicos cuxos promotores estean dispostos a destinar o 50% da enerxía xerada á industria a través da rúbrica de contratos de subministración bilaterais.
Como moeda de cambio, Feijóo insta o Goberno central a "acompañar" esta medida con medidas de alivio do prezo da enerxía, actuando sobre a fiscalidade da electricidade.
Do seu lado, Ribeira recoñeceu que "nada impide anticipar o calendario" e apuntou que, desde o Goberno, está a traballarse para activar os avais necesarios para apoiar eses PPA, abrindo a porta incluso a que "institucións europeas" poidan darlles cobertura. Tras recoñecer que a industria do aluminio primario resulta "fundamental para o país", a titular de Transición Ecolóxica constatou, por outra banda, que "nada impide" que os acordos bilaterais que firme Alcoa poidan supor a subministración eléctrica a través de strong <>instalacións renovables situadas "lonxe de Galicia".
