O presidente da Xunta en funcións, Alberto Núñez Feijóo, puxo sobre a mesa da Conferencia de Presidentes celebrada este venres en La Rioja a necesidade de atopar de forma urxente unha solución que garanta a viabilidade da fábrica de Alcoa en San Cibrao.
Un día despois de que o popular remitise unha carta ao presidente do Goberno, Pedro Sánchez, para solicitarlle que se aprobe "de forma inmediata" unha tarifa eléctrica estable e competitiva para a industria electrointensiva e que, mentres non o faga, nacionalice temporalmente a fábrica, volveu insistir respecto diso na súa quenda de intervención na Conferencia de Presidentes.
Ao termo, Feijóo compareceu ante os medios de comunicación e reiterou a urxencia para que se concrete de forma inmediata unha tarifa eléctrica que garanta a continuidade de Alcoa, xa sexa cos actuais propietarios ou cun futuro comprador para "a primeira e única fábrica de aluminio primario" que existe en España.
"Espero e desexo, logo de escoitar o presidente, que o poidamos conseguir nos próximos días porque non temos moito máis tempo", xa que se non se atende de forma inmediata esta solicitude "estariamos a falar da destrución da fábrica máis importante de aluminio de España", advertiu. O vindeiro martes finaliza o período de consultas sobre o expediente de regulación de emprego (Ere) anunciado para a fábrica de aluminio, que afecta a máis de 500 traballadores.
