A familia de Concepción Arias, a muller falecida o pasado 13 de xaneiro en Ourense a quen por erro se lle asignou a identidade dunha compañeira, reclamaba este mércores máis axilidade por parte do xulgado para levar a cabo a exhumación da falecida.
As dúas anciás foron trasladadas desde a residencia de maiores de Xove a outra de Pereiro de Aguiar xestionada pola mesma empresa ao contraer covid. Un trámite que esperan angustiados desde hai varios días e co que tratarían de pechar en parte un doloroso capítulo da súa vida.
"O dano xa está feito e non se pode volver atrás, pero aínda que sabemos que hai saturación nos xulgados, agravada polo covid, cremos que non debería haber tanta demora en liquidar esta cuestión tan delicada, tanto por nós como pola outra familia", recorda un sobriño da falecida, cuxo familiar máis directo é un irmán que reside en Asturias.
A muller está enterrada na parroquia de Xuances e debe ser trasladada ata o cemiterio de Xove, do que apenas distan uns quilómetros pois se atopan dentro do mesmo municipio.
