A familia de Irene Baladrón Zorita, a moza que faleceu na Semana Santa de 2018 na praia das Catedrais tras recibir o impacto de pedra na cabeza, continuará reclamando nos tribunais que se recoñeza algunha responsabilidade nas causas do falecemento da moza. Unha vez pechada a vía penal, agora exporán un recurso contencioso-administrativo contra a Xunta de Galicia, que era a administración que ordenou regular os accesos ao areal, así como contra a empresa Estudos Técnicos Topysa, responsable directa da contratación e ordenación do persoal que levaba a cabo esa función.
Baixo o seu punto de vista, tanto a Xunta como a empresa actuaron de forma neglixente ao non advertir convenientemente aos visitantes de que había un perigo certo de desprendementos na praia.
Engaden algúns factores puntuais á falta de información xeneralizada que eles detectan, por exemplo que os encargados do control dos accesos non fixeron ningunha indicación aos visitantes aquel día, incluso despois de que fosen advertidos por outros visitantes da praia de que se estaban producindo desprendementos.
Tamén din que non se tivo en conta outra circunstancia a maiores, como que facía moi poucos días que a zona fora vítima do paso do temporal bautizado como ‘Hugo', que entenden que puido afectar á estabilidade das rocas na praia.
A familia cre que se debeu de advertir aos visitantes do perigo de desprendementos
Os familiares da moza aseguran que non teñen ningún interese en determinar a contía de indemnización algunha neste caso, senón tan só o recoñecemento de que existiu unha responsabilidade ante a falta de información aos visitantes do areal ribadense do que eles consideran que era unha situación potencialmente perigosa.
Irene Baladrón Zorita faleceu o 31 de marzo de 2018 e uns meses despois a súa familia iniciou un proceso por vía penal que foi sobreseído no que solicitaban a cualificación dos feitos como un homicidio por imprudencia con especial falta de neglixencia nos vixiantes do areal.
Agora intentarano nun tribunal distinto para que "a xustiza dea por sentado que fallaron as medidas de seguridade" e que ese fallo tivo como consecuencia o falecemento da moza.
