A familia do desaparecido en Viveiro está "desesperada" ante a falta de noticias sobre o seu paradoiro. As batidas por pistas do concello, tanto por terra como desde o mar, por parte de veciños, familiares e amigos de Alejandro Meitín San Isidro, concluíron sen resultados.
O rastrexo afectou a todas as pistas do municipio vivariense, así como á área máis próxima no concello de Xove, á parroquia de Bravos (Ourol), limítrofe tamén co concello vivariense, e incluso houbo quen se desprazou ata a zona de Ortigueira para tratar de localizalo, aínda que todo foi infrutuoso ata o momento. "Non atopamos nada logo de mirar todos os sitios por onde podería caer nun posible accidente".
Familiares e amigos teñen intención de continuar, pero non saben cara a onde apuntar, xa que non hai pistas novas sobre o paradoiro de Álex, do que aseguran que tiña unha boa relación coa nai e a irmá, con quen convivía. "Isto é unha agonía, pasan as horas e ninguén di nada nin sabe nada".
Pola súa banda, a Policía Nacional continúa coa investigación aberta e mantén como principal hipótese a desaparición voluntaria deste home, de 34 anos de idade, que mide 1,83 de estatura, ten o pelo moreno, ollos castaños e leva pendentes en ambas as orellas. Á cea de empresa á que acudiu o sábado pola noite ía vestido con vaqueiro, camisa a cadros e anorak. Tamén falta o seu coche, un Ford Fiesta gris metalizado, que pode confundirse cun azul ceo, de matrícula 0480-FVJ. Ao non aparecer tampouco o vehículo crese que puido ter marchado pola súa propia vontade, o que estraña á familia.
