Un tripulante con residencia no municipio de Alfoz, de onde é oriúndo, faleceu este xoves pola mañá tras permanecer varios días ingresado nun centro hospitalario da cidade de Glasgow (Escocia). O home puido sufrir un corte cando estaba a traballar a bordo da embarcación.
Desde o buque solicitaron a presenza dun helicóptero a través do centro radio médico para a súa evacuación e traslado a un hospital próximo aos caladoiros de Gran Sol, entre Irlanda e Escocia, onde operaba o barco.
O obxectivo foi que persoal especializado puidese prestarlle a asistencia necesaria, pero a situación complicouse unha vez que estivo no hospital escocés, onde terminou perecendo. O accidente produciuse xa a finais da semana pasada e o home estivo ingresado uns días, pero o seu estado empeorou e na xornada deste xoves produciuse o seu óbito.
A familia está á espera dos trámites de repatriación, polo que non se sabe aínda con exactitude cando chegará a España para o enterro.
