En condicións normais a cidade do Landro iniciaría a súa semana grande co bulicio dos confrades ultimando os actos de cada día, o son de campás, tambores e cornetas ou os miles de visitantes que completaban a asistencia ás procesións con visitas guiadas, compras, viños e tapeo. "É unha sensación estraña, a estas alturas Viveiro estaría cheo de xente", apunta a alcaldesa, María Loureiro. O ano pasado o Concello cifrou nunhas 40.000 as persoas que acudiron pero nesta edición "inaudita" o baleiro aprópiase das rúas.
"A Semana Santa nunca deixou de celebrarse. Podían saír máis procesións ou menos pola choiva pero nas igrexas celebrábanse os actos e tamén estaba a exposición ‘Antesala dun Museo' para ver as imaxes dos pasos", recorda a rexedora, a quen "reconforta" que a decisión de suspender os actos sexa polo menos "por unha causa sanitaria" e que o próximo ano retomarán a celebración "con máis forza se cabe", conscientes do tirón que ten sobre todo desde a súa declaración de Festa de Interese Turístico Internacional.
A Xunta de Confrarías anima a seguir o programa de procesións na súa canle de Youtube
