Varios arqueólogos civís e da Armada española continúan traballando estes días no fondo da ría ribadense, nunha segunda campaña de investigación, tras o seu achado en 2011, do galeón español do século XVI mellor conservado do mundo, en palabras do seu descubridor, Miguel San Claudio. O especialista traballa cun profesor de Arqueoloxía Náutica da Texas A&M University, o portugués Filipe Vieira de Castro, para quen resultaría mellor conservar o buque onde está, porque extraelo sería moi custoso.
«O mellor xeito de conservar este navío é escavalo, rexistralo, enterralo ou tapalo e conservalo in situ», opina este especialista que vive desde hai dúas décadas en College Station, Texas, e que forma parte do departamento de arqueoloxía fundado por George Bass fai máis de 40 anos.
RÉPLICAS DO BARCO. «Unha vez que teñamos o rexistro, poderiamos compartir a información, construír ou imprimir réplicas do buque, mostralo como o atopamos e despois, reconstruílo», propón o profesor, que traballa con San Claudio, colega ao que ten en gran estima e respecto. «Os computadores permiten hoxe en día, mediante realidade aumentada ou virtual contar a historia da aventura española no mundo, sen necesidade de grandes investimentos e usando a imaxinación e os datos achegados polos arqueólogos e historiadores», engade.
Na súa opinión, extraer o navío do fondo da ría resultaría caro e implicaría «un custo enorme de preservación e musealización» e o ejemplifica argumentando que «pasariamos dun custo equivalente ao duns centímetros de autovía ao de varios quilómetros».
A Dirección Xeral de Patrimonio da Consellería de Cultura da Xunta de Galicia dirixe e impulsa esta relevante intervención e aínda é pronto para desvelar as conclusións sobre as análises efectuadas.
A Dirección Xeral de Patrimonio da Consellería de Cultura impulsa e dirixe esta relevante intervención arqueolóxica
MUSEALIZACIÓN. O docente da Universidade A&M de Texas confía en obter fondos ou axudas para poder escavar o navío enteiro nos próximos tres ou catro anos. «Sería fundamental que Galicia investise na contratación dun conservador que puidese tratar as coleccións de artefactos que imos levantar», propón.
Tras o descubrimento e a primeira prospección que levou a cabo, os obxectos achados que se puideron extraer, deriváronse ao Museo do Mar en Vigo. Algunhas das pezas están xa expostas e outras en fase de conservación e recuperación.
Desde que se descubriu, protexeuse cunha malla e o lodo conseguiu, segundo os expertos, preservar gran parte das pezas que se salvaron do espolio. Mañá venres expertos do CSIC, a Armada e os arqueólogos participarán nuns relatorios no Teatro Ribadeo, a partir das oito da tarde.