O exterminador de velutinas da firma vivariense Serpa, José María Vázquez, solicita aos propietarios de terreos próximos a casas que adopten todas as precaucións posibles, dado que este ano estas avespas fixeron os seus niños a niveis de terra, en ladeiras de montes ou mesmo debaixo do chan a fin de protexerse do frío que se prolongou durante máis tempo.
O tamén apicultor aconsella esperar ao mes de agosto para cortar a maleza, salvo que haxa moita présa, pois nesa data as velutinas xa abandonarían os niños primarios. José María Vázquez sinala que estes avispeiros están agora no seu momento de maior crecemento, con entre 100 e 150 exemplares de avespas, e que as raíñas abandonarán os mesmos en breve para crear os secundarios, de maior tamaño, en árbores e cornixas.
O especialista asegura que é recomendable levar unha careta de apicultor que cubra a cabeza en lugar das típicas lentes que se usan para realizar rozas, xa que a careta salvagarda máis.
O responsable de Serpa considera que a Administración debería tomarse máis en serio a loita contra o insecto invasor ofrecendo charlas para que os apicultores poidan realizar trampeo profesional, ademais de explicar aos veciños como actuar cando achen niños próximos ás vivendas.
ENTERRO. Doutra banda, a Policía Nacional de Viveiro aclarou que o home que faleceu o sábado pasado en Boimente por picaduras de avespas non era sabedor de que fose alérxico, versión que tamén sostén a familia, que segue á espera da autopsia. Durante estes días houbo controversia sobre a especie que o picou. Fontes oficiais apuntaron que podía tratarse da autóctona, pero tanto a familia como o amigo que estaba co finado aseguran que eran velutinas.
O finado Félix González Díaz, de 43 anos, recibiu varias picaduras. Aínda que o home que estaba con el rozando púxolle unha inxección de adrenalina, esta non lle fixo efecto. A familia está moi afectada. A misa de funeral e o enterro, tras a autopsia, serán este luns ao catro da tarde no cemiterio e igrexa de Magazos, parroquia na que residía o home. A saída será desde o tanatorio de Alianza e Barros.
