A empresa Euroarce Caolines, que realiza a actividade do grupo mineiro aragonés Samca na Mariña, segue co seu proxecto de explotación de caolín. Segundo confirmaron fontes da empresa, nestes momentos están a traballar no deseño do proxecto de explotación e rehabilitación dos terreos na mina da Monte Castelosituada entre os municipios de Burela e Cervo, valorando todas as posibles opcións.
Os traballos tamén se centran na modelización e caracterización do xacemento, unha vez terminada a intensa campaña de sondaxes e de investigación do recurso mineral durante os dous últimos anos.
Neste sentido, o director de minería en Galicia de Samca, Carlos Martínez Torres, explicou que "tras a avaliación dos recursos mineiros dispoñibles, agora trátase de facer o deseño da extracción e da localización exacta da futura planta industrial para o procesado do mineral". "Sabemos que nesta fase o proxecto é menos visible porque este traballo científico e técnico que se realiza no laboratorio e con modelados dixitais, polo que non hai a visibilidade habitual nos traballos de campo", engade, mentres subliña que "con todo isto preténdese deseñar unha explotación, unha rehabilitación e unha planta de procesado que cumpra os estándares máis esixentes da actual minería sostible".
Precisamente con respecto á planta de procesado, Martínez Torres detalla que se vai a situar en Monte Castelo para minimizar o transporte de materiais e a súa eficiencia". "Non hai unha localización precisa aínda, xa que dependerá, entre outras cousas, do estudo de geotecnia", dixo.
Outro dos asuntos que é necesario abordar neste proxecto é a saída dos camións do xacemento. Neste sentido, desde Euroarce matizaron que "cando se defina a localización da planta industrial, avaliaranse os diferentes trazados cos criterios de eficiencia e posibles afeccións, considerando as achegas propostas de usuarios de terreos, institucións, etc.". "Un compoñente moi importante é a conexión coas infraestruturas portuarias, posto que o material debe chegar aos centros de consumo, e un dos transportes máis eficientes e sostibles actualmente é o marítimo", engaden.
Material
Ademais de Monte Castelo, Euroarce Caolines ten outras dúas minas na Mariña, ambas en operación e producindo materias primas para a industria cerámica. Trátase de Mina Begoña, en Foz, e Mina Quinta, en Barreiros.
Ademais de Monte Castelo, Euroarce Caolines ten outras dúas minas na Mariña
Nestes momentos, a empresa tamén está a realizar distintas investigacións en laboratorio e probas de produto para adaptar o caolín da Mariña ás necesidades dos mercados e os compradores que son, fundamentalmente, a industria de fabricación de baldosas e pavimentos cerámicos.
