O atleta vivariense Adrián Ben confirmou este martes a súa participación na quinta edición do Cros Nacional Ponche Romana de Lugo, que regresa á capital logo de dous anos e que homenaxeará nesta cita ao histórico Mariano Castiñeira Vilaseca, médico e adestrador de atletas falecido o pasado ano.
Ben, que se estrea co seu novo club, o Adidas -deixou o Fútbol Club Barcelona tras cinco anos na entidade azulgrana- estrearase "ao grande" coas súas novas cores e farao en casa "", onde para el é máis especial, e nun circuíto que, recoñece, seguiu "sempre". "Claro que si, é o cros da miña casa, non o do meu xardín pero case. Corrino sempre, para min é un circuíto especial que teño moitas ganas de correr, e polas circunstancias que se deron este ano, así será", asegurou.
Adrián Ben recoñece que chega en bo momento, "adestrando moi duro estas semanas". Di que chegará "todo o ben que me permita o meu adestrador, porque foi unha semana dura de cargas, pero con moitísimas ganas de correr en casa e de estrearme con Adidas ao grande", engadiu.
Para Ben, o seu cambio de club é "un paso adiante, porque crezo no profesional dentro dun club cun persoal impresionante como Ana Peleteiro -medallista olímpica-, Carlos Maio -medallista europeo- ou Óscar Husillos -campión europeo-... é unha familia moi grande que me vai a permitir crecer como atleta e como persoa", di o mariñán, que tras o Cros Ponche Romana planificará "os dous próximos meses" e buscará seguir o ano cunha carreira en pista cuberta.
A PROBA. A quinta edición do Cros Nacional Ponche Romana de Lugo pretende consolidarse como unha das probas máis importante da xeografía nacional dentro da súa disciplina. Organizada por Championchip Norte en colaboración co Concello de Lugo e o club Escola Atlética Lucense, a cita reunirá nas inmediacións do Pazo de Feiras e Congresos de Lugo a máis de 1.050 deportistas de todas as categorías entre o sábado 15 e o domingo 16 próximos.
A organización conta cun gran cartel tanto en próbaa elite masculina como na elite feminina, sempre co obxectivo de xerar un espectáculo digno das mellores citas, pero sobre todo á altura do que significa o traballo do estrañado Mariano Castiñeira para a familia atlética lucense.
