O estaleiro de Armón en Burela botou este xoves un catamarán fabricado en aluminio —Armón C-817—, que ten como destino a exportación. O buque realizará servizos de apoio a un iate do mesmo cliente e aloxará varias embarcacións de recreo, incluído un hangar para acomodar un helicóptero.
Con 68,20 metros de eslora, dispón de varios medios de elevación para a descarga de todos os artefactos así como varios camarotes para aloxar tanto a tripulación do buque, ata 18 persoas, como a persoal técnico, ata 14 efectivos.
Este catamarán do tipo shadow cat dispón de varias medidas de carácter ecolóxico como motores propulsores certificados de acordo con IMO TIER 3 utilizando tecnoloxía SCR para o tratamento dos gases de escape, un sistema de tratamento de augas residuais que asegura a limpeza antes de botalas ao mar ou un sistema de almacenaxe de lixo que lle permite permanecer longos períodos de tempo en alta mar sen necesidade de tirala á auga.
