As estafas por internet seguen á orde do día. Dúas veciñas de Viveiro presentaron sendas denuncias na comisaría do Corpo Nacional de Policía tras caer na trampa e transferir 17.000 e 3.200 euros, respectivamente.
A coñecida como do 'militar americano' supuxo unha perda de 17.000 euros a unha muller, que ademais subscribiu uns préstamos por unha cantidade descoñecida cunha suposta financeira inglesa, que agora posiblemente lle enviará notificacións solicitando a devolución das cotas.
A estafa dese importe fíxose a través de nbsp;& solicitudes sucesivas, a primeira das cales se produciu no mes de xullo do pasado ano, mes en que xa se produciu outro caso similar, que acumulou 15.200 euros.
UN GATO. Doutra banda, unha moza denunciou que foi obxecto doutra estafa ao tratar de comprar un gato nunha páxina web de venda de animais o pasado día 14. O suposto dono pedía 300 euros polo animal, importe que abonou na conta que lle dixeron, pero non recibiu o gato.
O estafador reclamoulle despois diñeiro para gastos sanitarios, transporte e outros, indicándolle que despois o devolvería, algo que non fixo, a pesar de que a compradora tamén abonou ditos importes. Unha vez que pagara 3.200 euros, ao solicitarlle máis, pensou en que podía tratarse dunha estafa, polo que presentou a denuncia correspondente.
