O tirón das recreacións históricas segue á alza, como demostraron esta fin de semana o sexto Ribadeo Indiano e o duodécimo Mercado Renacentista de Viveiro, que non só permiten a recuperación dun legado cultural con espectaculares representacións e ambientación, senón que tamén dinamizan economicamente as localidades en que se desenvolven.
O presidente de Acisa, Francisco Iriarte, mostrábase o domingo exultante polo discorrer dunha festa coa que este ano esperan bater todas as marcas, tanto de afluencia como de movemento económico. A súa primeira apreciación era "moi positiva, con máis visitantes que o ano pasado e aínda queda toda a tarde -indicaba ás seis-". Ata ese momento calculaban que xa pasaran pola vila unhas 50.000 persoas, unha cifra similar á rexistrada na edición precedente, en que o negocio nos sectores da hostalería, comercio e servizo alcanzou os tres millóns de euros. "Todos están a mellorar os números do ano pasado e non temos queixas de ningún tipo", resaltaba.
Iriarte apuntaba así mesmo a expectativa xerada pola actuación do renombrado grupo Compay Segundo, que ás oito e media da tarde abarrotou a rúa San Roque, así como polo sorteo da viaxe a Cuba, que encheu varias urnas de papeletas. "Hai moita afluencia e cremos que o día de hoxe vai ser tan importante como o de onte ou máis", recalcou.
Éxito de afluencia no concerto de Compay Segundo
O responsable da asociación de comerciantes destacaba así mesmo a resposta do público, que o sábado pola tarde envorcouse e continuou co baile "coma se non chovese, houbo que atrasar media hora actuación das corais, pero a xente esperou con paciencia e pedímoslles desculpas por iso", subliñou.
Da boca do alcalde de Ribadeo, Fernando Suárez, saía unha e outra vez a palabra " marabillosa" para cualificar unha festa de época que segue crecendo sen tocar teito. "Tanto pola xente que participa, veciños de aquí, de aló, polos que veñen de fóra; vos coches clásicos que chegaron dende distintos sitios, a presenza en hoteis e restaurantes", relataba.
Esa afluencia mantívose o domingo con 250 comensais no xantar popular da Devesa. "Todo é unha marabilla que temos que seguir coidando e traballando. Ribadeo está a lume de biqueira de xente bailando, nas charlas do teatro, as actividades culturais e musicais", recalcou ao observar o apoxeo que tomou a cita, que " é a festa de referencia en tan só seis anos", concluíu o rexedor.
VIVEIRO. A concelleira de cultura de Viveiro, Lara Fernández, asegurou tamén que esta "é unha das edicións máis participativas en todos os sentidos do Mercado Renacentista, tanto nas comidas como pola afluencia". O desembarco do venres "estivo a lume de biqueira, é un evento que vai "in crescendo", impresionaba ver o paseo cheo de xente que foi expresamente para ver o espectáculo na praia Covas, co desfile ata a Praza Maior, que estaba ata os topes e que resultou incrible coa entrada do dragón articulado que cuspía fume de cores e que deu moita espectacularidade. Parecía que estabamos en Xogo de Tronos", destacou.
Lara Fernández: "Parecía que estabamos en Xogo de Tronos"
O tempo tamén xogou a favor, "case non choveu", e isto contribuíu a que os asistentes "estivesen ata altas horas da madrugada na rúa. Había moi bo ambiente e a xente foi respectuosa, ademais non temos coñecemento de que houbese incidencias de relevancia. O mercado xa está consolidado como unha festa indispensable no calendario estival de Viveiro", recalcou.
Lara Fernández resaltou que "sempre hai cousas que mellorar, tomamos nota do que non funcionou, pero estamos orgullosos de que as asociacións queiran colaborar de maneira desinteresada para que saian adiante actos como o do desembarco de Carlos V xunto a Vos Castelos", un enclave que considera magnífico para ese acto, "que achega a cita a Covas á vez que concentra xente á espera en Viveiro coa expectativa da entrada na praza, facendo que os locais estean cheos ata última hora".
A concelleira agradeceu aos visitantes a súa presenza e aos veciños "que cada ano envórcanse máis", ademais de animalos a seguir caracterizándose, o que fai "moi espectacular o evento", que este ano tamén gañou en postos no mercado, con 105 participantes foráneos e dez locais, obrigando a ampliar o espazo ocupado. "É unha satisfacción que pidan vir a Viveiro", resumiu.
Os participantes nas comidas tamén respectaron o toque de queda fixado para que ás sete e media da tarde deixasen libres as rúas principais. "Non houbo inconveniente en levantar as mesas, ao contrario porque quedou máis espazo para bailar", indicou eloxiando a colaboración. Lara Fernández precisou que ao ser un evento cada vez máis multitudinario, o Concello ten que "sentar unhas bases para velar pola seguridade de todos e dar tamén a oportunidade de descansar ao que non quere participar".
Luís Manuel Leal Garzón, xerente de Legend -firma que instalou o mercado e colaborou na escenificación-, subliñou que "cada ano vai a máis, a acollida do público é maior e estamos encantados co ambiente e as vendas".
