Ermida negociará pola depuradora de San Miguel con catro consellerías

A alcaldesa de Barreiros, a nacionalista Ana Ermida, solicitou manter un encontro con catro consellerías para conseguir o financiamento necesario para desbloquear a construción dunha depuradora en San Miguel de Reinante. O proxecto para a súa execución xa está listo. Redactouno Augas de Galicia e o seu custo é 3,3 millóns de euros.

O mal funcionamento e a escasa capacidade da depuradora actual fan que se xeren multitude de problemas ambientais que se visualizan sobre todo no regacho que baixa ao mar atravesando a praia de Arealonga no seu parte máis oriental, en Reinante, que é unha fonte continua de malos cheiros e contaminación. A propia Ana Ermida denunciou esta situación en numerosas ocasións cando estaba na oposición, polo que apuntou que é unha das súas prioridades acabar con ese problema.

A alcaldesa contactou coas catro consellerías implicadas nun proxecto que terá un custo superior aos tres millóns de euros

Na carta enviada ás consellerías de Medio Ambiente, Turismo, Sanidade e Infraestruturas a rexedora recorda a existencia do proxecto para a nova depuradora pero engade que "o Concello de Barreiros ten un censo poboacional de menos de 3.000 habitantes, porén a súa poboación flotante multiplica esta cifra por máis do triplo nos meses de verán. Isto supón que os servizos que se precisan, deben estar dimensionados para atender dita demanda; o que require de investimentos importantes para poder levar a cabo ditas execucións".

Sobre a reunión, Ana Ermida engade que dado que se pode apuntar que o orzamento da nova depuradora é elevado, recorda que é unha infraestrutura que toca a varias consellerías "que se poderían implicar na resolución deste problema, por iso solicitamos unha xuntanza para abordar esta cuestión coas distintas que poden estar implicadas". A solicitude xa foi enviada este xoves.