"Moito enfado" no comité de Alcoa co Goberno por non aprobar aínda o estatuto

O presidente do comité de empresa da factoría que a multinacional Alcoa ten na Mariña, José Antonio Zan, recoñeceu que nestes momentos o sentimento é "moito enfado" dos traballadores co Goberno por non aprobar na súa primeira reunión o estauto de empresas electrointensivas.

José Antonio Zan recordou que na visita que realizou á planta de Alcoa a ministra de Industria, Reyes Maroto, asegurou que a aprobación dese estatuto ía ser tratada como un asunto de "urxencia" cando queda constituído o novo Goberno, previsiblemente no "primeiro Consello de Ministros".

Con todo, lamentou o portavoz do comité de empresa, constituído o Goberno e celebrado o primeiro Consello de Ministros, segue "nun caixón".

"Tiña que ir no primeiro Consello de Ministros", insistiu, ademais de recordar que o próximo 23 de xaneiro celebrarase a reunión a catro bandas –Goberno de España, Xunta de Galicia, Alcoa e comité de empresa– para buscar solucións que permitan garantir a actividade da planta mariñá e a continuidade dos miles de postos de traballo que dependen dela.

"A ver se o sacan pronto", dixo José Antonio Zan, para ter –algo sobre o que poder traballar–.
Ao seu xuízo, –xa non se pode seguir mareando a perdiz semana tras semana–, e menos despois de que a compañía anunciase unhas –malas previsións– para a factoría no ano que acaba de comezar se non se produce unha rebaixa no prezo da enerxía.