O conselleiro delegado do grupo empresarial Ence, Ignacio Colmenares, afirmou este martes que ten previsto investir na súa planta de fabricación de pasta de celulosa de Navia o financiamento programado para a de Pontevedra, polo que "é moi probable" que a cifra de 300 millóns prevista para a factoría asturiana "se dobre" en cinco anos.
Desta forma, o investimento nesta factoría do occidente asturiano podería roldar os 600 millóns de euros e gañar 200 empregos, extremo que dependerá do que finalmente pase coa planta que Ence ten en Pontevedra e coa solicitude de prórroga da súa actividade para 60 anos máis xunto á ría.
Colmenares realizou estas declaracións momentos antes de reunirse co presidente do Principado, Javier Fernández, con cuxa saída da política, afirmou, péchase "un período moi importante" en Ence Navia, onde se investiron 350 millóns de euros desde 2007.
A celulosa ten comprometidos no seu plan estratéxico ata o ano 2023 outros 325 millóns de euros de investimento, sen contar os que poden chegar dos destinados inicialmente á factoría galega.
O conselleiro delegado, que apuntou que nos últimos dez anos a fábrica naviega dobrou a súa capacidade de produción e aumentou un 30 por cento o seu persoal, fiou o traspaso a Asturias do investimento programado para a planta de Pontevedra á "seguridade xurídica" que, no caso de Asturias, non ofrece dúbidas xa que a planta se asenta en chan da súa propiedade que se ve afectado pola Lei de Costas.
O compromiso da "ampliación grande" da planta de Navia sitúase nun horizonte temporal "entre 2021 e 2022" e suporá a diversificación da produción cara á fabricación de celulosa para produtos de incontinencia ou para viscosa con aplicacións téxtiles.
A ampliación podería supor sumar 250.000 toneladas máis de produción anual ás 80.000 que xa teñen programadas para este ano. En total durante 2019 é moi probable que a produción da factoría naviega se sitúe nun horizonte próximo ás 600.000 toneladas.
REVULSIVO. Este enorme volume de produción fai que aos poucos a factoría naviega de Ence acabe por converterse nun auténtico pulmón a nivel de emprego non só no Occidente de Asturias senón en toda a comarca mariñá, xa que ese aumento progresivo da produción está a implicar tamén un incremento de postos de traballo.
Diso benefícianse en boa medida municipios como Ribadeo, onde reside unha cantidade moi importante de traballadores e a través de cuxo porto Ence move gran cantidade de mercancía.
