A empresa Rotugraf Ribadeo S.L. atópase entre o 6% das firmas de toda Galicia que máis creceu durante o ano pasado. Iso valeulle facerse acredora do distintivo Rotugraf como empresa ‘Gacela' que concede a institución pública Consorcio da Zona Franca de Vigo.
A xerente de Rotugraf, Raquel López González, explica que para eles recibir un recoñecemento como este, "no que a nosa empresa familiar forma parte do 6% das que máis crecen en Galicia, é algo moi importante para nós. é moi grande estar nesa lista con Inditex".
Botando a vista atrás, López González recorda que Rotugraf naceu algo máis de quince anos como un proxecto familia "moi pequeniño" no que dispuñan de moi "pouca infraestrutura" e que principalmente rotulaba valos nos campos de fútbol. A partir de aí, conta o seu xerente, "a empresa foi crecendo ata o punto de que hoxe podemos dicir que temos todas as máquinas que existen no sector e traballamos para varias multinacionais". De feito, agora mesmo Rotugraf exporta os seus produtos a cinco continentes.
Por iso Raquel López cre que este premio "é o recoñecemento a reinvestir os beneficios en maquinaria, en materiais e en I+D do noso sector" á marxe de que insiste en que "supón un orgullo moi grande saber que obxectivamente con estas decisións estamos a facelo ben".
O delegado especial do Estado no Consorcio da Zona Franca de Vigo, David Regades Fernández, foi quen comunicou aos responsables da empresa Rotugraf Ribadeo a decisión. Recordou que a través do servizo de información Ardán seleccionan empresas galegas que destacaron no desempeño de distintos factores relacionados coa competitividade empresarial.
David Regades engade que en Zona Franca de Vigo son moi conscientes das dificultades que leva a xestión empresarial. Di que "estamos inmersos nun mundo cada vez máis complexo, os cambios nos mercados e nos procesos empresariais son máis intensos e os ciclos que os acompañan cada vez máis curtos. Por todo iso as empresas con calidades diferenciais, como Rotugraf, son referentes de gran valor na nosa economía pola súa capacidade e dinamismo na atracción de talento e investimento, así como na creación de riqueza e emprego".
