Unha empresa pertencente a un grupo de Noruega mostrou interese en levar a cabo un proxecto para cultivar salmón no porto de Burela ou a súa contorna, segundo soubo este diario. A iniciativa atoparíase en fase de estudo neste momento e aínda non se presentou de xeito oficial no Concello burelense, onde debería solicitar os permisos pertinentes para pór en marcha a granxa de cativa desta especie.
Un dos principais obstáculos con que tropezou o proxecto ata o momento ten que ver coas esixencias técnicas que require, debido sobre todo á gran cantidade de auga doce que sería necesaria para o funcionamento das instalacións.
O inconveniente principal reside na forte dependencia que neste sentido ten o Concello de Burela dos depósitos situados en Cervo e Rúa, de cuxos encoros se fornece actualmente a localidade.
Técnicos da empresa adxudicataria do servizo de abastecemento, Espiña e Delfín, xunto con técnicos da firma interesada e da Administración autonómica serían os encargados de avaliar esta posibilidade.
O cultivo de salmón está moi estendido en Noruega, país escandinavo que ten convenios específicos coa Unión Europea para a comercialización deste produto, que inicialmente se iniciou alí a partir de exemplares salvaxes. Os pescadores aproveitaban a súa migración cara a augas doces desde o océano para a súa captura e incorporación aos criadeiros.
A actual técnica de cultivo mediante a utilización de gaiolas flotantes situadas no mar provén de finais dos anos 60 e ten a súa orixe en Noruega, país que é un dos principais expoñentes mundiais, xunto con Chile e Canadá.