Polémico empate do Pescados Rubén en Vista Alegre. A 20 centésimas para o final, os árbitros sinalaron unha máis que dubidosa falta que deu a oportunidade a Retamar de transformar o dobre penalti que igualou un encontro onde o conxunto local sempre foi por diante. Un punto no resultado final sabe a pouco tras dominar o cadro de Burela un partido onde mandou ata cinco balóns á madeira.
O partido púxose de face moi pronto para o conxunto local. Un penalti cometido sobre Pazos converteuno desde os seis metros Matamoros. Ambos os equipos buscaban portería. Tiveron os visitantes unha dobre oportunidade que sacou Kaluza, pero foi Iago Míguez o que mandou á escuadra un balón morto que quedou na área. Pouco despois Álex Diz transformou o seu disparou en gol tras unha boa parede con Míguez.
O Pescados Rubén FS estaba a darse un festín á conta dun equipo que só o intentaba desde a media distancia. Giasson mandou un balón ao pau antes de que Kaluza detivese un dobre penalti a Luka, que en cambio non perdoou á saída dun córner para pór o 3-1. No epílogo do primeiro tempo, Pitero mandou á rede un balón morto tras un córner.
Tras varios intercambios de golpes improdutivos por ambas as partes, Javi Alonso foi capaz de acurtar diferenzas tras unha perda de balón local tras o descanso. ‘Mata' e Pazos tocaron madeira, pero Quintela mandou un balón á escuadra á saída dun córner para pór o 5-2.
Coa expulsión de Javi Rodríguez por dobre amarela viñeron os problemas. Gol de Jamur e acoso constante, con xogo de cinco a falta de cinco minutos. Javi Alonso recortou aínda máis as diferenzas e Retamar igualou no último suspiro.
Ficha técnica
Pescados Rubén: Kaluza, Diego Quintela, Pazos, Javi Rodríguez, Renato —quinteto inicial—, Iago Míguez, Lucho, Álex Diz, Matamoros, Giasson, Pitero e Eto'o.
Fútbol Emotion Zaragoza: Iván Bernad, Adri Ortero, Eloy Vermellas, Jamur, Dian Luka —quinteto inicial—, Retamar, Villanueva, Juanqui, Javi Alonso e Richi Felipe.
Goles: 1-0, mnuto 2: Matamoros, de penalti. 2-0, m.6: Iago Míguez. 3-0, m.8: Álex Diz. 3-1, m.16: Dian Luka. 4-1, m.18: Pitero. 4-2, m.24: Javi Alonso. 5-2, m.30: Quintela. 5-3, m. 33: Jamur. 5-4, m.36: Javi Alonso. 5-5, m.40: Retamar, de dobre penalti.
Árbitros: Sánchez Llorente e Toca Campo. Expulsaron a Javi Rodríguez por dobre amarela (m. 33); Amarelas aos xogadores locais Matamoros, Iago Míguez, Pitero e Lucho. Amarelas nos visitantes para Dian Luka e Óscar Villanueva.
Incidencias: Pavillón Vista Alegre, entrada reducida.
