A concelleira do Partido Popular de Viveiro María Jesús Vale presentou este luns a súa renuncia ao cargo, como xa anunciara este xornal.
"Sinto unha gran decepción tanto coa xestión do Partido Popular provincial de Lugo, como coa xestión de augas de Galicia dependente da Xunta de Galicia", explica a edila nun comunicado, no que engade que "por principios e ideais" non se ve motivada para seguir no cargo.
A edila popular foi moi crítica nos últimos días co ente autonómico Augas de Galicia tras a riada de Xunqueira, onde resultou danada a casa na que vive o seu pai e onde ten os seus recordos familiares. "Estou falando en contra do meu partido, pero isto é cousa de Augas de Galicia porque non deixa limpar os ríos, tálanse árbores e iso vai cara aos canles, túpense e logo pasan estas catástrofes. Isto non se pode permitir. Son os efectos secundarios de que Augas teña todo isto desatendido", aseveraba a este diario á mañá seguinte do suceso.
Tampouco quedou calada cando visitou a zona a conselleira de Infraestruturas, á que insistiu en que parte da responsabilidade nos danos que causara a riada a tiña Augas. Vale sentiuse molesta polas declaracións que realizou Ethel Vázquez na visita á localidade lucense, onde se mostrou convencida de que a riada "non se podía "evitar" e incidiu en que se debe a un fenómeno que pode ocorrer "cada 500 anos".
No seu lugar está previsto que entre, segundo as fontes do partido consultadas por Europa Press, Antonio Lage Seara, responsable de Novas Xeracións (NN.XX.) na localidade.
