Alcoa estivo moi presente este luns no pleno de Viveiro a través dos concelleiros do PSOE César Iglesias e Emilio Villarmea, que traballan na multinacional e acudiron á sesión plenaria vestidos coa súa roupa da fábrica para visibilizar cos seus chalecos amarelos a súa oposición ao peche da planta de aluminio e demandar unha solución para San Cibrao. Precisamente, o fillo de Villarmea, o youtuber Dani, realizou un vídeo que se fixo viral para pedir ao presidente do Goberno, Pedro Sánchez, que evite a clausura e a perda de postos de traballo.
LIXO E LIMPEZA. O goberno local de Viveiro levou ao pleno extraordinario a aprobación do novo contrato para a prestación do servizo de limpeza viaria, recollida, transporte e tratamento de residuos sólidos urbanos e xestión do punto limpo, cun orzamento de licitación de 1,4 millóns anuais e unha duración inicial do contrato de catro anos (6,16 millóns en total) aínda que se poderá prorrogar durante un máis. Descarta así a xestión directa do servizo, que implicaría ter que facer un gran investimento en maquinaria e dificultades para a contratación do persoal.
Unha novidade é que o contrato inclúe prestacións que ata agora realizaba persoal municipal, como a recollida de aveños a domicilio ou a recollida de cartón aos comercios do casco.
Ademais o goberno levou ao pleno os pregos para o novo contrato do servizo de axuda no fogar, cunha duración de dous anos con opción dun de prórroga e un orzamento máximo de 2.694.917,05 euros para o total das dúas anualidades iniciais.