O punto sumado polos Peixes Rubén Burela FS na pista do Manzanares, cuarto da tempadaten máis valor anímico que clasificatorio, segundo recoñeceu o adestrador do conxunto mariñán, Alberto Riquer, que se mostrou satisfeito a medias co conseguido na provincia de Cidade Real. "Non estamos contentos porque queriamos máis e necesitabamos gañar, pero hai que darlle valor a sumar un punto fóra de cada ante un rival de enorme potencial ofensivo", sinalou, referíndose ao poderoso cadro de persoal do rival tras as chegadas de Fits e Campos. "Demostraron ser xogadores determinantes, sobre todo a nivel de pegada", engadiu.
Riquer destaca a capacidade competitiva e de supervivencia que mostrou o seu equipo nunha situación tan delicada a nivel clasificatorio e sen gañar ningún partido en toda a liga. "Se somos capaces de funcionar a este nivel sen sumar nunca de tres en tres, non quero nin pensar no que poderiamos ser capaces de facer coa confianza que dan os triunfos e os puntos. Está claro que somos moi competitivos, pero nos falta dar ese pequeno paso para gañar partidos", sinala.
O preparador mariñán destaca a capacidade dos seus para sobreporse dúas veces a un marcador adverso e incluso cre que antes do 0-1 foran mellores que o rival. "Nunha situación de ansiedade e tensión como a que vivimos creo que saímos á cancha moi mentalizados e facendo as cousas ben. Gustoume o que fixemos na elaboracion, aínda que ao final foron eles os que se puxeron por diante. Ao final non temos o tipo de xogadores como Fits ou Campos, que teñen unhas características ofensivas que garanten pegada e que aguantan a pelota a moitos metros da súa propia área", di.
OUTRO PARTIDO VITAL. Tanto Riquer como os seus xogadores pensan xa no partido do domingo en Zaragoza. Alí buscarán o seu primeiro triunfo na apertura da segunda volta, o que lles permitiría non só achegarse á zona de permanencia, senón incluso saír da última praza que ocupan desde a segunda xornada do campionato.
"é outro partido decisivo, incluso case máis ao estar máis cerca na clasificación que o Manzanares", sinala Riquer, que espera que o cansazo de partidos e viaxes non pase factura. "Desde o pasado xoves, que xogamos ante O Pozo, estamos de xira cos partidos de Xaén e Manzanares. Neste sentido non podo estar máis orgulloso e satisfeito dos xogadores que teño, que o pon todo sen queixarse", conclúe o adestrador do cadro burelense.
