Traballadores de Distribucións Carreiras traballan desde primeira hora deste venres na limpeza da nave desocupada que pertenceu a Cristalería Burela, no polígono de entrada a esta localidade. A celeridade para atopar unha nova sede e continuar a súa actividade tras o incendio do xoves, clave non só para a propia firma de distribución, con 35 traballadores, senón tamén para os seus múltiples clientes de hostalería na provincia de Lugo.
Á primeira hora da tarde está prevista a visita do vicepresidente primeiro da Xunta, Francisco Conde, ao polígono de Cuiña, onde a nave sinistrada seguía emitindo abundante fume este venres pola mañá.
ASÍ FOI O INCENDIO. O vento foi o peor aliado na tarde deste xoves á hora de sufocar o incendio que se iniciou ás catro menos cuarto na nave de Distribucións Carreiras, que ocupa a parcela 137 do polígono industrial de Cuiña.
Un incendio do que se investigan as causas e que devorou por completo as instalacións, que arderon en apenas unha hora, a pesar dos numerosos medios que se mobilizaron, con efectivos dos parques de bombeiros de Viveiro e Barreiros e o GES cervense, ademais de Garda Civil, Protección Civil de Burela e de Xove, que prestou unha motobomba e unha ambulancia do 061, aínda que por fortuna non se rexistraron feridos.