O bispo de Mondoñedo-Ferrol, Fernando García Cadiñanos, expresou onte a súa alegría ao presentar a mesa social da infancia e a familia que impulsan entidades sociais eclesiásticas para mellorar a atención aos menores e as familias en situación de exclusión.
A plataforma de diálogo nace capitaneada por Cáritas diocesana, as Fillas do Divino Celo de Burela, as Escravas da Inmaculada Nena de Viveiro e as Irmás Apostólicas de Cristo Crucificado de O Barqueiro, co obxectivo de sumar esforzos coas administracións no ámbito da formación, o traballo en rede e a sensibilización sobre o problema da pobreza herdada.
Cadiñanos defendeu o espírito colaborativo en presenza da alcaldesa de Viveiro, María Loureiro. O prelado destacou a súa sorpresa ao comprobar a gran presenza da Igrexa nese ámbito dentro da diocese, mediante formación, acollida ou acompañamento. Sinalou que as dificultades animan a crear un espazo para buscar solucións a través da xornada que se desenvolverá este sábado no hotel O Val do Naseiro.
A secretaria xeral de Cáritas diocesana, Marta Pazo, indicou que "o que máis nos preocupa é a transmisión intergeneracional da pobreza. Aprecian descoñecemento dos sistemas sanitario e educativo que dificulta o acceso aos recursos, sobre todo cando detectan necesidades especiais. Podemos ser axentes que loiten contra esa roda que afecta aos menores, o maior risco que teñen é sufrir tamén esta situación na idade adulta, porque afecta ás súas expectativas vitais".
As 30 delegacións parroquiais de Cáritas na diocese atenderon a 1.600 familias en 2021, pero cren necesario dar un paso máis e acompañarlles no desenvolvemento integral. Máis de 80 menores recibiron reforzo socioeducativo, ademais de facilitar o seu acceso ao lecer para favorecer o seu inclusión. Tamén traballan coas familias a alfabetización, talleres de saúde ou economía doméstica.
Achan dificultades por barreiras da linguaxe de familias migrantes, outras que proceden de situacións de violencia, desestruturación ou desemprego, e a pegada do covid en adolescentes con problemas de saúde mental e psicolóxica.
O director do centro San Aníbal de Burela, Jesús Igrexas, apuntou que a diocese ten doce centros especializados, sete para familias en exclusión e atende a 200 mozas. "As intervencións requiren moita especialización e tempo de traballo", dada a variada problemática. Confía en que a nova lei de protección da infancia (Lopivi) garanta "un bo trato e permita romper a fenda".
Demandou un seguimento dos mozos, o que motivou a intervención do xefe territorial de strong Política Social, Javier Vázquez Nodal, quen destacou o compromiso das entidades relixiosas "que suplistes carencias das administracións públicas" e animou a seguir traballando da man.
O director do colexio de A Pontenova, Jorge García, exporá os protocolos en casos de abusos sexuais, de poder ou neglixencias sobre os máis vulnerables.
