Un ano máis, a coñecida como Romaxe do Bo Xantar, ou romaría do Naseiro, chega hoxe para cumprir cos romeus que levan un ano enteiro esperando a festa. A comisión de festas do Naseiro de Viveiro é a encargada de organizar o evento. A pesar de existir varias novidades, como a eliminación da baixada ao río e a prohibición de aparcar e acampar aos arredores do mesmo, a festa está asegurada. Seis días de diversión continua, con sesións vermú e verbena polas noites, que finalizarán o mércores co día do neno.
Este venres arrinca o festexo co día do polbo, no que todos os asistentes poderán gozar deste típico manxar galego. Mentres degustan a súa comida, poderán deleitarse coa charanga Os Charangos, que amenizará a enchente. O sábado na capela do campo da festa haberá unha misa solemne en honra á virxe dos Remedios, á unha e media do mediodía, seguida da procesión e, a continuación, a sesión vermú amenizada polas dúas orquestras que tamén estarán na verbena: Arizona e Alkar.Este ano elimínase a tradicional baixada ao río e prohíbese aparcar e acampar nas inmediacións do mesmo
A mañá do domingo estará protagonizada por outra misa e procesión, seguida da sesión vermú coas orquestras A Nave e Stereo amenizando unha longa sesión vermú. E tamén actuarán na verbena. O luns os asistentes poderán gozar doutra sesión vermú a cargo de Gran Casino e Kalima 3.0., grupos que tamén actuarán esa noite.
A sesión vermú do mércores estará a cargo do grupo Kalima 3.0. e da orquestra Televisión, que tocarán de novo esa mesma noite na verbena para o goce dos asistentes. O mércores é o último día desta romaría, a cal pon o punto final desta edición os pequenos serán os protagonistas ao ser o día do neno. No campo de festa haberá atraccións para eles a prezos populares.
ENTERRO
Nesta edición da romaría do Naseiro eliminouse a xa coñecida como baixada ao río. Recórdase aos asistentes que está prohibido acampar e aparcar nas proximidades do Landro, ademais de tirar verteduras ao mesmo. Tamén se recomenda non cruzar nin bañarse no río. Para despedir esta gran tradición presente desde 1991, celebrarase un enterro da baixada o luns ás sete da tarde no campo da festa.
Esta homenaxe á baixada do río, actividade vixente durante 27 anos na romaría, funciona como substituto da mesma, e decidiu facerse para recordar os bos e divertidos momentos que viviron todos os participantes nesta actividade. Así, os organizadores deste enterro invitan a que todo o mundo acudan ao velorio ás sete da tarde ao campo da festa. Piden que os asistentes vaian de loito: vestidos de negro. Ademais, recomendan levar os inchables tan característicos da baixada.
