A Garda Civil detivo este luns en Burela a tres mozos por roubar catro bicicletas valoradas nuns 5.000 euros dun edificio de San Cibrao, en Cervo. Dous deles son veciños dese mesmo municipio e teñen 22 e 24 anos, respectivamente, mentres que o terceiro, menor de idade, reside na capital lucense. Ademais, segundo informou a Benemérita, tamén está imputado en calidade de investigado un veciño de Monforte, de 42 anos. Todos eles están acusados dun delito de roubo con forza nas cousas e danos.
Os feitos tiveron lugar o pasado mes de xaneiro en cinco trasteiros dun mesmo edificio, e, á marxe do valor das bicis, recuperadas no marco desta investigación, está pendente de realizarse unha tasación das desfeitas causadas para subtraelas. Tanto os tres detidos como o investigado pasarán en breve a disposición xudicial.
