Un cidadán de 33 anos e de orixe romanesa residente en Vegadeo, en Asturias, foi detido na Pontenova cando viaxaba na súa furgoneta, na que transportaba cobre supostamente roubado. Ademais, outras dúas persoas permanecen investigadas por un delito de receptación.
A Garda Civil informou este xoves da detención, que se produciu un día antes, cando o arrestado circulaba xunto con outras dúas persoas pola estrada N-640 á altura do termo municipal da Pontenova.
Tras recibir o alto, os axentes inspeccionaron o interior do vehículo e descubriron dous sacos dun metro de longo cada un que contiñan no seu interior cable de cobre.
As bolsas atopábanse semiocultas entre a chatarra e residuos transportados na zona de carga. As outras dúas persoas identificadas, de 23 e 27 anos de idade e veciños de Lugo, manifestaron que compraran o cobre ao detido, que supostamente se aproveitaba da súa condición de empregado dunha empresa de montaxes eléctricas para subtraer o material.
O cobre intervido foi posto a disposición dos seus lexítimos propietarios. Estas pezas son utilizadas en instalacións e montaxes eléctricas de grande envergadura. A persoa detida e as dúas investigadas serán postas a disposición xudicial.
