A Garda Civil detivo seis persoas e practicou catro rexistros domiciliarios en Foz e Barreiros, no marco da operación Thorir contra o tráfico de drogas na comarca da Mariña.
No transcurso da operación, que a Garda Civil puxo en marcha ao sospeitar de que o exercicio da prostitución na zona estaba relacionado co tráfico de drogas, foron intervidos seis quilos de haxix, 100 gramos de cocaína, útiles para cortar e adulterar substancias estupefacientes, varios vehículos e 40.000 euros en efectivo.
A investigación comezou coa vixilancia dos movementos de certas persoas vinculadas co tráfico de estupefacientes durante o confinamento decretado polas autoridades sanitarias para frear a expansión do covid-19. Os axentes encargados da investigación comprobaron que os sospeitosos se saltaban de forma frecuente a orde de confinamento, "sen razóns nin causas justificativas para a súa saída, intensificando a súa actividade ilícita no momento da desescalada", precisa a Garda Civil nun comunicado.
A rede desmantelada buscaba subministracións incluso en provincias como Guipúzcoa, de onde procedía a maior partida de droga intervida, que foi a que precipitou a fase de "explotación" da operación.
O primeiro arrestado, un veciño de Eibar, dirixíase á Mariña con seis quilos de haxix ocultos na roda de reposto do coche no que viaxa con tres fillas menores
Tras varios meses de investigación, os axentes encargados do caso lograron "identificar os principais integrantes da rede". En coordinación co xulgado de instrución dous de Mondoñedo, concretouse a primeira detención, concretamente a dun veciño de Eibar (Guipúzcoa) de 41 anos, cando se dirixía á Mariña con seis quilos de haxix, ocultos na roda de reposto do turismo no que viaxaba con tres das súas fillas menores, para sortear posibles controis anticovid. Para atopar a droga foi preciso un exhaustivo rexistro do vehículo e a participación do Servizo Cinolóxico da Garda Civil.
As investigacións tamén permitiron determinar que a persoa detida contaba coa colaboración dos supostos destinatarios da droga, que "varrían a zona ao obxecto de detectar presenza policial nas entradas ás localidades da Mariña", de modo que informaban dos "mellores días para acceder á comunidade" e burlar os controis establecidos na autovía A-8.
Na fase de explotación tamén foi detido un veciño de Foz, de 36 anos, que era
O xuíz decretou o ingreso en prisión de catro dos seis investigados
Tras eses arrestos, realizouse un rexistro na vivenda deste último, onde foi atopada máis droga e diñeiro supostamente procedente do tráfico de estupefacientes.
Nunha segunda fase foron detidos dous veciños de Foz, de 40 e de 42 anos, e un veciño de Barreiros, de 43. A estes interviñéronselles diversas cantidades de cocaína e haxix, dispostas para a venda, atopadas tanto no momento do seu arresto como nos dous rexistros levados a cabo nas localidades de Foz e Barreiros.
Un dos domicilios de Foz era compartido por dous dos sospeitosos como lugar de seguridade e a Garda Civil atopou no trasteiro da vivenda o lugar no que se realizaba a pesada, corte e distribución en dose.
Na fase final da operación imputouse en calidade de investigado un veciño da Caridade (Asturias) de 33 anos, por participar supostamente nun delito de coaccións, "ao compartir cos outros acusados un episodio para recuperar diñeiro procedente do tráfico de drogas e da prostitución".
Tras ser postos a disposición da autoridade xudicial, decretouse o ingreso en prisión de catro dos seis investigados e a Garda Civil deu por finalizada esta operación.
