A muller detida en Viveiro este martes acusada de apoloxía do terrorismo tras a súa suposta radicalización xihadista atópase en Madrid á espera de ser interrogada no Xulgado Central de Instrución número cinco, que instrúe o operativo xunto coa Fiscalía da Audiencia Nacional.
Segundo fontes da investigación, a muller foi conducida este martes a Madrid, onde espera pasar a disposición xudicial. Esta é a segunda vez que é detida, porque xa fora arrestada en 2018.
En Viveiro, a operación causou unha gran sorpresa. A alcaldesa, María Loureiro, asegurou estar "sorprendida", do mesmo xeito que "todos os veciños", pola detención. "Non sabemos máis no Concello do que sae nos medios de comunicación", afirmou.
A rexedora, tras recoñecer que a noticia "pon os pelos de punta" e "é impactante", felicitou á Garda Civil por esta intervención, indicando que "levan tempo con este operativo". "A nivel xeral en España, a nivel de terrorismo, temos unhas forzas e corpos de seguridade do Estado competentes, e neste caso tamén", dixo.