Os axentes do Corpo Nacional de Policía detiveron unha veciña de Burela que coidaba a persoas maiores a domicilio e que foi arrestada no seu centro de traballo, despois de que os familiares de tres deses maiores lle atribuísen o furto de diferentes xoias.
A detención produciuse o pasado xoves ás sete e vinte da tarde, a requirimento do empresario para o que presta os seus servizos, con quen se puxeron en contacto as familias para denunciar o que estaba a suceder.
As investigacións efectuadas permitiron confirmar que a muller vendera en establecementos de compravenda de Viveiro xoias por valor duns 1.950 euros, cantidade da que lograron recuperarse 1.850 euros e unha parte do diñeiro en efectivo, así como varias alfaias que a detida levaba no seu poder no momento da detención e que poderían proceder dos furtos.
As pescudas continúan abertas coa finalidade de esclarecer se se produciu algún caso máis, o que indicaría que habería máis maiores afectados por esta acción delituosa. Todos os indicios apuntan a que os referidos feitos ocorreron ao longo das últimas semanas.
RECLAMADO. Doutra banda, a Policía Nacional detivo así mesmo a un turista procedente de Madrid que se hospedaba nun hotel de Covas ao existir na súa contra unha orde xudicial de arresto por danos procedente dun xulgado de Zaragoza.
Ocorreu o sábado pasado ás once da mañá, sendo posto a disposición xudicial pola tarde. Ademais, tiña outras dúas ordes de investigación de domicilio por un caso de estafa ditadas por xulgados de Logroño e Madrid.
