A pesar da previsión de choiva que fixo que algúns grupos non acudisen e de que "barruzaba un pouco", o desfile de Entroido de Lourenzá foi un ano máis multitudinario, con 1.460 disfrazados de moi diversas procedencias e numeroso público ao longo dun percorrido que partiu do recinto feiral e concluíu na Praza do Concello.
A Asociación de Comerciantes, Industriais e Autónomos de Lourenzá (Acial) organizou a cita e mostrou a súa satisfacción pola alta participación. "Estamos contentos porque polo menos aguantou o tempo. Fallou un grupo de Viveiro porque alí estaba chovendo moito e por iso non veu, pero polo demais moi ben, as rúas estaban cheas de xente", comentou o presidente do colectivo impulsor, Javier Huertas, quen destacou así mesmo a participación de disfrazados non só do propio municipio e doutros mariñáns como Foz, Mondoñedo, Burela, Cervo ou A Pontenova, senón doutros da provincia como Abadín ou Sarria e incluso da Coruña como un grupo de Melide.
Os organizadores repartiron entre as categorías infantís e de adultos máis de 6.000 euros en premios
Entre folclóricas, toureiros, piratas, flores e diversos tipos de animais coáronse este ano fabas, xa que unha das novidades nesta edición era a introdución dunha categoría con temática da festa gastronómica laurentina. "Fixémolo por primeira vez coa intención de promocionar a faba", recordou Huertas, con premios cuxa dotación económica procedía da recadación das viaxes do tren turístico durante a Festa dá Faba, que tiñan un donativo de 1 euro.
Nesta categoría animáronse a participar os nenos do colexio local, un centenar, que ían disfrazados de fabeiras coas súas casetas. Se neste apartado quedou algún premio deserto, a contía reservarase para futuras iniciativas en relación coa faba ou a súa festa, xa que a intención é "promocionala todo o ano", segundo explicou o presidente da asociación de comerciantes.
MÁIS DE 6.000 EUROS. Os organizadores repartiron entre as categorías infantís e de adultos máis de 6.000 euros en premios, que se entregaron na noite do domingo na Praza do Concello por parte de membros da corporación municipal e directivos da asociación despois de que deliberase un xurado composto por concelleiros de cultura de distintos concellos mariñáns. Animou a festa o dúo Epo-K e tamén houbo chocolate, bocadillos ou hamburguesas para repoñer forzas.
