A Policía Nacional descarta polo momento que detrás da agresión de tres menores a un mozo ocorrida na madrugada do sábado ao domingo pasado en Viveiro se esconda un posible delito de incitación ao odio, debido á condición sexual da vítima.
Desde a comisaría vivariense solicitan cautela, dado que por agora unicamente prestaron declaración o denunciante e unha persoa que foi testemuña dos feitos, sen que das súas manifestacións poidan extraerse datos que ratifiquen a acusación de homofobia difundida a través das redes sociais, e á que este luns se sumaron diferentes colectivos, como Avante LGTB.
Estes mostraron o seu apoio á convocatoria dunha concentración que se apraza para dar tempo á realización das pescudas policiais que permitan aclarar o sucedido.
A asociación de veciños Casco Antigo de Viveiro manifestou o seu rexeitamento ante calquera tipo de violencia e o apoio á vítima e á súa familia.
A Policía Nacional estaba este luns pendente da declaración dos tres menores, así como das cinco testemuñas que acompañaban á vítima á saída do pub, pero ademais apareceron outras testemuñas, que o fiscal de Menores quere que tamén presten declaración.