Dous sucesos de índole parecida afectaron as inmediacións da praia ribadense das Catedrais, aínda que ningún dos dous con suficiente entidade para trastornar a súa rutina e onte o areal seguía co cartel de 'completo' colgado e expedíronse os 4.812 pases máximos diarios para visitala. Por unha banda, produciuse un desprendemento nunha cala próxima ao areal, a uns 200 metros en dirección Barreiros, e, por outro, caeu a varanda de protección da pasarela do miradoiro entre As Catedrais e Arealonga, xa en Barreiros.
Os axentes da Policía Local de Ribadeo precintaron a zona para prohibir o acceso ao miradoiro, debido a que o vento derrubou o valo de protección da pasarela. Tamén caeu un sinal indicativo que advirte do perigo de asomarse sobre o cantil. En canto ao derrube na cala analizarase a súa posible extensión.