O adestrador do Pescados Rubén FSF, Julio Delgado, mostrouse feliz polo título conseguido polo seu equipo. "Foi o partido soñado por xogadoras e afección, un espectáculo, creo que vai deixar pegada en todos nós e é un luxo poder ser adestrador dun destes equipos", dixo.
Para o preparador, "a clave estivo en vernos capaces de gañarlle ao Futsi e conseguímolo a pesar de que os tres primeiros minutos do partido foron moi malos, pero o equipo demostrou moita madurez", afirmou. Tamén tivo palabras de agradecemento e encomio para a afección local. "Gocei de cada segundo, Vista Alegre foi un espectáculo. Sabía que o fútbol sala ía ser xusto, aínda que se perdésemos iríame igualmente moi contento co equipo", indicou.
#EnVídeo 📹 Las jugadoras del Burela FSF recogen la Copa de la Reina 🏆 [Vídeo de Miguel Albo] pic.twitter.com/gWOhchM2Ss
— A Mariña El Progreso (@AMarina_EP) June 16, 2019
Finalmente, Julio Delgado dedicoulle o título, dixo, "ao meu amigo Neco, que fixo moito polo fútbol sala e fóillenos hai uns anos". "Tiñamos que dedicarlle algo grande e nada mellor que isto. Foi unha gran Copa, cunha gran despedida a unha xogadora como Bea Seijas e cunha final espectacular nunha Bombonera chea e gozando. Vai por el", concluíu Delgado.
PEQUE E LARA, FELICES. Peque, autora de dous goles e unha das líderes do seu equipo, estaba exultante: "Unha cousa é gañar e outra facelo en Burela. Isto é outro rolo e non ten comparación posible". Pola súa banda, para a vivariense Lara Balseiro "é un soño feito realidade poder gañar a Copa a 25 quilómetros da miña casa. Burela apostou por esta Copa e saíu todo á perfección", expresou. Ana Romero, outra das heroínas locais ao deterlle o penalti a Ari, sinalou que "estou sen palabras, ver o brillo dos ollos das miñas compañeiras é espectacular", indicou.
Manuel Branco, presidente do Pescados Rubén, mostrouse "orgulloso do traballo que fixeron toda a tempada, polo que recibiron unha merecida recompensa. Dá gusto xogar diante desta afección e que a xente veña a gozar e a emocionarse con estes encontros".
